ປະທານບໍລິສັດ ພູສີກຣຸບ ເຂົ້າຮ່ວມແຂ່ງຂັນກ໋ອຟ ຊີງຂັນເຈົ້າແຂວງຫຼວງພະບາງ ສົ່ງເສີມການທ່ອງທ່ຽວສີຂຽວ.

March 10, 2022

ທ່ານ ສີທອງ ພົມມະຈິດ, ປະທານບໍລິສັດ ພູສີກຣຸບ ໄດ້ເຂົ້າຮ່ວມການແຂ່ງຂັນກ໋ອຟສົ່ງເສີມການທ່ອງທ່ຽວແຂວງຫຼວງພະບາງ ຊີງຂັນທ່ານເຈົ້າແຂວງຫຼວງພະບາງ ເພື່ອເປັນການໂຄສະນາດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເຂົ້າມາທ່ຽວຫຼວງພະບາງໃຫ້ຫຼາຍຂຶ້ນ, ສ້າງບັນຍາກາດໃນການຕ້ອນຮັບນັກທ່ອງທ່ຽວໃຫ້ມີຄວາມຄຶກຄື້ນ ແລະ ເຜີຍແຜ່ຄວາມສວຍງາມຂອງບັນດາແຫຼ່ງທ່ອງທ່ຽວຂອງແຂວງ.

ການແຂ່ງຂັນຄັ້ງນີ້, ຈັດຂຶ້ນເມື່ອວັນທີ 5 ກຸມພາ 2022 ທີ່ສະໜາມກ໋ອຟແຂວງຫຼວງພະບາງ, ໂດຍໃຫ້ກຽດເຂົ້າຮ່ວມຂອງ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ, ຄະນະທີ່ປຶກສາສະໂມສອນກ໋ອຟອາວຸໂສລາວ, ທ່ານ ປອ. ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ທ່ານ ຮສ.ປອ ກອງສີ ແສງມະນີ ປະທານສະຫະພັນກິລາກ໋ອຟແຫ່ງຊາດລາວ ແລະ ທ່ານ ປອ. ຄຳຂັນ ນະພາວົງ ປະທານສະໂມສອນກັອບອາວຸໂສລາວ ພ້ອມດ້ວຍນັກທຸລະກິດ ແລະ ນັກກິລາທັງພາຍໃນ ແລະ ຕ່າງແຂວງເຂົ້າຮ່ວມເກືອບ 100 ຄົນ.ຜ່ານການແຂ່ງຂັນເປັນເວລາ 1 ວັນ ຜົນປະກົດວ່າ:

ລາງວັນຕີໃກ້ທຸງຂຸມ 2 ທ່ານ ຫຼ້າຄຳດີ ເຮືອງປະເສີດ, ລາງວັນຕີໃກ້ທຸງ ຂຸມ 7 ທ່ານ ບົ່ງຫວ່າງ ຫວ່າງເຈຍຊາ, ລາງວັນຕີໃກ້ທຸງ ຂຸມ 13 ທ່ານ ໄພທູນ ຄຳນຶງສຸກ ແລະ ລາງວັນຕີໃກ້ທຸງ ຂຸມ 17 ທ່ານ ຈີຣະສັກ ວົງປະດິດ; ສາຍ ອາວຸໂສ 71 ປີ ຂຶ້ນໄປ ຊະນະເລີດ ທ່ານ ປອ. ບຸນກອງ ສີຫາວົງ ແລະ ຮອງຊະນະເລີດ ທ່ານ ຄຳຈັນ ສີພັນທອງ. ສາຍອາວຸໂສ 60-70 ປີ ຊະນະເລີດ ທ່ານ ໂອໄລ ແລະ ຮອງຊະນະເລີດ ທ່ານ ຄຳມົນ ຈັນມາວົງ; ສາຍ ກ ຊະນະເລີດ ທ່ານ ສັນຕິ ສີທຸມພະລັດ ແລະ ຮອງຊະນະເລີດ ທ່ານ ສົມຊາຍ ຍົດສະຫວັນ; ສາຍ ຂ ຊະນະເລີດ ທ່ານ ຕຸ້ຍ ຄຳວັນດີ ແລະ ຮອງຊະນະເລີດ ທ່ານ ບຸນເລື່ອມ ມະນີວົງ; ສາຍ ຄ ຊະນະເລີດ ທ່ານ ວັນໄຊ ແລະ ຮອງຊະນະເລີດ ທ່ານ ໄຊຍະວົງ; ລາງວັນຊະນະເລີດ ບໍ່ມີແຕ້ມຕໍ່ ທ່ານ ພັນຕີ ສິນໄຊ ພິລາສຸກ; ສາຍສຸພາບສະຕີ ຊະນະເລີດ ທ່ານ ນາງ ມາກຕິນ ເຮີ.

(ເນື້ອໃນ: ລູກນ້ຳເຊ, ພາບ: ເສດຖະກິດ-ການຄ້າ)

Leave a Reply

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *